2020-yilda, pandemiyaning avj pallasida, ko‘pchilik rejalarini kechiktirib, mavjud holatini saqlab qolishga urinayotgan paytda, Durdona Muhiddinova avtomaktab ochishga ahd qildi. Biznesda tajribasiz va muvaffaqiyatga hech qanday kafolat bo‘lmasa-da, u faqat bir narsaga amin edi – ayollar o‘zlari uchun qulay muhitda haydovni o‘rganishlari zarur.
Tajribam yo‘q edi
Bir kun kelib o‘yladim: men kabi o‘zini xotirjam va xavfsiz his qilishi muhim bo‘lgan ayollar uchun avtomaktab tashkil etsam qanday bo‘larkin?
Men bu biznes haqida deyarli hech narsa bilmasdim va qanday jarayonlarga duch kelishimni tasavvur ham qilolmasdim. Na tajribam, na uning ichki tuzilishini tushunishim bor edi. Biznes-reja ham, hamma narsani nazorat qilayotganimni his qilish ham yo‘q edi. Faqatgina istak va bunday maktab chindan ham kerakligini his qilish bor edi – va men bu nima bilan yakunlanishini bilmasam-da, harakat qilib ko‘rishga tayyor edim.
Agar men buni biror kishi uchun emas, balki o‘zimga o‘xshagan ayollar uchun yaratib ko‘rsam-chi?
Qiziqish qo‘rquvdan kuchliroq bo‘ldi
Bu ish amalga oshmasligi mumkinligini xayolimga ham keltirmaganman. Orqaga nazar tashlab qarasam, o‘shanda menda qo‘rquv hissi deyarli yo‘q ekan. Aksincha, bu yo‘l meniki ekanligiga ichki bir rozilik bor edi. Bu na g‘ayrat, na ishonch, balki qilayotgan ishimni sokinlik bilan qabul qilish edi.
Ilk bor Fayzobod hududida yolg‘iz qolganimda, atrofdagi muhitning o‘zi vahimali tuyuldi. Baland ovozda gaplashish odatiy hol sanalgan joyda yagona ayol men edim. Ko‘z yoshlarimni yashirib, o‘z ishimni boshqalardan ko‘ra yaxshiroq bajarishga intildim – shikoyatsiz, so‘z bilan emas, amalda isbotlashga harakat qildim.
Boshqalarning gaplari haqida
Ishni boshlashdan oldin faoliyat yuritayotgan avtomaktabga bordim – vaziyatni ko‘rib, maslahat so‘rash uchun. Va hech qachon esimdan chiqmaydigan gapni eshitdim: «Nima? Sen buni hech qachon uddalay olmaysan. Qo‘lingdan kelmaydi».
Beqarorlik haqida
Eng qiyini barqarorlikning yo‘qligi edi. Har yili yangi talablar paydo bo‘lardi. Eng dahshatli lahza butun respublika bo‘ylab barcha avtomaktablar bir kunda yopib qo‘yilgani bo‘ldi. Jamoa senga umid bilan qaraydi, sen esa o‘zingni ojiz his qilasan. Bu juda og‘ir tuyg‘u.
Nima uchun taslim bo‘lmaslik kerak edi
Bu maktab ayollarga qanchalik zarur ekanini tasavvur ham qilmagan ekanman. Ba’zilar bunday avtomaktabni 10–15 yil kutganini aytishdi.
Ayniqsa, bir o‘quvchi ayol xotiramda chuqur iz qoldirdi. U umr bo‘yi mashina haydashni orzu qilgan, ammo doim oilasi va majburiyatlari tufayli keyinga qoldirgan ekan. O‘ziga vaqt ajratganida, og‘ir kasallikka chalinib qoldi. Operatsiyadan oldin eridan, agar hammasi yaxshi o‘tsa, o‘qishni boshlashiga ruxsat berishini so‘radi. O‘shanda tushundim – taslim bo‘lishga haqim yo‘q. Kimdir uchun AutoLady shunchaki ta’lim olish emas, balki orzusini ro‘yobga chiqarish imkoniyatidir.
Qo‘rqinchli bo‘lsa ham oldinga intilmoq
Qo‘rquv yo‘qolmadi. Men tizzalarim qaltirab, ammo qat’iyat bilan oldinga intilardim. So‘nggi yillarda avtomaktablar ayniqsa og‘ir ahvolda qoldi. Ammo shunchaki omon qolish emas, balki ulg‘ayib, eng yaxshilar safiga qo‘shila olganingni anglash senga katta kuch bag‘ishlaydi.
Qo‘llab-quvvatlash
Mening tayanchim – onam, turmush o‘rtog‘im va farzandlarim. Ular bo‘lmaganida, men uddalay olmas edim.
Qo‘llab-quvvatlash ko‘pincha men kutmagan joydan ham kelardi. Yaqinlarining xavotiri esa vaqt o‘tishi bilan g‘urur bilan almashdi.
Erkaklar ustun bo‘lgan tizimda ayol
Ha, bu asosan erkaklar faoliyat yuritadigan soha. Ammo vaqt o‘tib natijalar har qanday so‘zdan kuchliroq gapira boshladi. Noyabr oyida maktabimiz va rivojlanish strategiyamizni turkiy davlatlardan kelgan mehmonlarga taqdim etdik – ularni ayollarni o‘qitish tajribamiz qiziqtirdi.
AutoLady namunaviy avto maktab sifatida tanishtirildi. 2023 yilda Brend yil mukofotini oldik. 2024 yildagi ommaviy to‘xtashdan keyin faoliyatini tiklagan ilk avto maktablardan biri bo‘ldik.
Ichki o‘zgarishlar haqida
Biznes meni kuchliroq, xotirjamroq va o‘zimga ishonchliroq qildi. O‘z yo‘limni qadrsizlantirishni va mas’uliyatdan qo‘rqishni bas qildim. Endi aniq bilaman: ayolning kuchi qattiqlikda emas, balki barqarorlik, halollik va o‘ziga bo‘lgan ishonchda. Agar oldimda eshik yopilsa, men boshqa yo‘lni qidiraman.
Boshlash uchun hech qachon kech emas. Qo‘rquv faqat tajriba orqali yo‘qoladi.
Durdona Muhiddinova – tadbirkor ayol, «AutoLady» avtomaktabining asoschisi, sobiq matematika o‘qituvchisi va uch farzandning onasi. «AutoLady» loyihasi pandemiya davrida shaxsiy hamda kredit mablag‘lari hisobiga yo‘lga qo‘yilgan. Maktab dastlab faqat ayollarga mo‘ljallangan bo‘lib, bu madaniy ehtiyojga va ayollar uchun xavfsiz haydovchilik o‘rgatish muhitining yo‘qligiga javob tariqasida tashkil etilgan. Bugungi kunda «AutoLady» rivojlanib bormoqda: jamoa kengaydi, maktab «Yil brendi» mukofotiga sazovor bo‘ldi va shahar YHXBda namunali avtomaktab sifatida taqdim etildi. Durdona Muhiddinovaning aytishicha, ko‘plab ayollar bunday loyihaning paydo bo‘lishini 10–15 yil davomida intizorlik bilan kutishgan ekan.
